கருணைக்கிழங்கு புளிக்குழம்பு / Karunai Kilangu Pulikulambu

பரிமாறும் அளவு - 2 நபருக்கு

தேவையான பொருள்கள் -

1. கருணைக்கிழங்கு - 2
2. புளிக்குழம்பு பொடி - 3 மேஜைக்கரண்டி ( புளிக்குழம்புபொடி பார்க்க இங்கே கிளிக் பண்ணவும்)
3. மஞ்சள்தூள் - 1/2 தேக்கரண்டி
4. காயத்தூள் - சிறிது  
5. புளி - சின்ன கோலி அளவு 
6. உப்பு - தேவையான அளவு                     

அரைக்க -

1. தேங்காய் - 4 மேஜைக்கரண்டி 
2. சின்ன வெங்காயம் - 6                              

தாளிக்க -

1. எண்ணெய் - 3 மேஜைக்கரண்டி 
2. கடுகு - 1/2 தேக்கரண்டி 
3. உளுந்தம் பருப்பு - 1/2 தேக்கரண்டி 
4. நறுக்கிய வெங்காயம் - 1/4 பங்கு 
5. கறிவேப்பிலை - சிறிது                              

செய்முறை -

1. ஒரு பாத்திரத்தில் கிழங்கு மற்றும் தண்ணீர் சேர்த்து அடுப்பில் வைத்து கிழங்கை வேக வைக்கவும். 10 நிமிடங்களில் வெந்து விடும்.
2. கிழங்குகள் வெந்தவுடன் தண்ணீரை வடித்து விட்டு சிறிது நேரம் ஆற விடவும். ஆறியபின் கிழங்குகளை தோலுரித்து வட்டமாக வெட்டிக் கொள்ளவும்.
3. புளியை 200 மில்லி தண்ணீரில் ஊற வைத்துக் கரைத்துக் கொள்ளவும். தேங்காய், வெங்காயம் இரண்டையும் சேர்த்து மிக்ஸ்சியில் அரைத்துக் கொள்ளவும்.
4. அடுப்பில் கடாயை வைத்து எண்ணெய் ஊற்றி சூடானதும் கடுகு, உளுந்தம் பருப்பு போட்டு தாளிக்கவும். கடுகு வெடித்ததும் கறிவேப்பிலை, வெங்காயம் சேர்த்து வதக்கவும்.
5. வெங்காயம் பொன்னிறமானதும் கரைத்து வைத்துள்ள புளித் தண்ணீரை ஊற்றி கொதிக்க விடவும்.
6. கொதிக்க ஆரம்பித்ததும் புளிகுழம்புபொடி, மஞ்சள்தூள், காயத்தூள், உப்பு சேர்த்து நன்றாக கலக்கி விடவும். 
7. மசாலாவாடை அடங்கியதும் அரைத்து வைத்துள்ள தேங்காய் விழுது, வெட்டி வைத்துள்ள கருணைக்கிழங்கு துண்டுகள் இரண்டையும் சேர்த்து 5 நிமிடம் கொதிக்க விடவும்.                  
8. குழம்பு கெட்டியானதும் அடுப்பிலிருந்து இறக்கி விடவும். சுவையான கருணைக்கிழங்கு புளிக்குழம்பு ரெடி.