Monday, March 26, 2018

பச்சை பயறு கிரேவி / Green moong dhal gravy



பரிமாறும் அளவு - 2 நபருக்கு

தேவையான பொருள்கள் -
  1. பச்சை பயறு - 1/2 கப் 
  2. தக்காளி - 1
  3. இஞ்சி பூண்டு விழுது - 1 தேக்கரண்டி 
  4. மிளகாய் தூள் - 1 தேக்கரண்டி 
  5. மல்லித் தூள் - 1 மேஜைக்கரண்டி 
  6. சீரகத்தூள் - 1 தேக்கரண்டி 
  7. மஞ்சள் தூள் - 1/2 தேக்கரண்டி 
  8. கரம் மசாலா தூள் - 1/2 தேக்கரண்டி 
  9. உப்பு - தேவையான அளவு 
  10. மல்லித் தழை - சிறிது 
அரைக்க -
    1. தேங்காய் துருவல் - 1/4 கப் 
    2. முந்திரிப்பருப்பு - 5
    தாளிக்க -
    1. எண்ணெய் - 3 மேஜைக்கரண்டி 
    2. சீரகம் - 1 தேக்கரண்டி 
    3. பெரிய வெங்காயம் - 1
    செய்முறை -
    1. பச்சை பயறை தண்ணீரில் 2 மணி நேரம் ஊற வைக்கவும். ஊறிய பிறகு குக்கரில் போட்டு தேவையான அளவு தண்ணீர் ஊற்றி அடுப்பில் வைக்கவும். நீராவி வந்ததும் வெயிட் போட்டு 3 விசில் வந்ததும் அடுப்பை அணைக்கவும்.
    2. வெங்காயம், தக்காளி, மல்லித்தழை எல்லாவற்றையும் வெட்டி வைக்கவும்.
    3. தேங்காய் துருவல், முந்திரிப்பருப்பு இரண்டையும் மிக்ஸ்சியில் அரைத்துக் கொள்ளவும்.
    4. அடுப்பில் கடாயை வைத்து எண்ணெய் ஊற்றி சூடானதும் சீரகம்  போடவும். பிறகு வெங்காயம்  சேர்த்து வதக்கவும்.
    5. வெங்காயம் பொன்னிறமானதும் இஞ்சி பூண்டு விழுது சேர்த்து வதக்கவும். பச்சை வாடை போனதும் தக்காளி சேர்த்து வதக்கவும்.
    6. தக்காளி நன்கு வதங்கியதும் மிளகாய் தூள், மல்லித் தூள், சீரகத் தூள், மஞ்சள் தூள், கரம் மசாலா தூள் சேர்த்து அடுப்பை சிம்மில் வைத்து ஒரு நிமிடம் கிளறி அதனுடன் ஒரு கப் தண்ணீர் மற்றும் உப்பு சேர்த்து அடுப்பை மிதமான சூட்டில் வைத்து கொதிக்க விடவும்.
    7. மசாலா வாடை அடங்கியதும் அரைத்து வைத்துள்ள தேங்காய் கலவை, அவித்து வைத்துள்ள பச்சை பயறு சேர்த்து 5 நிமிடம்  கொதிக்க விட்டு இறுதியில் மல்லித்தழை சேர்த்து அடுப்பை அணைக்கவும் சுவையான பச்சை பயறு கிரேவி ரெடி.
    8. பூரி, சப்பாத்தியுடன் சேர்த்து சாப்பிட நன்றாக இருக்கும்.

    Tuesday, March 6, 2018

    அரிசி பாயாசம் / Rice Kheer

    நான் வலைப்பூ ஆரம்பித்து இன்று ஐந்து ஆண்டுகள்  நிறைவடைந்து ஆறாம் ஆண்டு  தொடங்குகிறது. நான் இது வரை 380 பதிவுகள் கொடுத்திருக்கிறேன். என்னுடைய பதிவுகளை பார்த்து கருத்து சொன்ன நட்புள்ளங்களுக்கும், சில பதிவுகளை செய்து பார்த்து கருத்து சொன்ன நட்புள்ளங்களுக்கும் எனது நன்றியை தெரிவித்துக் கொள்கிறேன். இந்த நல்ல நாளில் ஈஸியான அரிசி பாயாசம் ஸ்வீட் பதிவு !!


    தேவையான பொருள்கள் -
    1. பாஸ்மதி அரிசி - 1/4 கப் 
    2. பால் - 4 கப் 
    3. நெய் - 1/4 கப் 
    4. சீனி - 3/4 கப் 
    5. முந்திரிப்பருப்பு - 1/4 கப் 
    6. காய்ந்த  திராட்சை - 10
    7. ஏலக்காய் தூள் - 1 தேக்கரண்டி 
    செய்முறை -
    1. அடுப்பில் கடாயை வைத்து ஒரு மேஜைக்கரண்டி நெய் ஊற்றி சூடானதும் முந்திரிப்பருப்பு, காய்ந்த திராடசை இரண்டையும் வறுத்து தனியே வைக்கவும்.
    2. பாஸ்மதி அரிசியை தண்ணீரில் அரை மணி நேரம் ஊற வைத்து தண்ணீரை வடித்து வைத்துக் கொள்ளவும். அடுப்பில்  ஒரு வாயகன்ற பாத்திரத்தில் பாலை ஊற்றி  கொதிக்கவிடவும்.
    3. கொதிக்க ஆரம்பித்ததும் அரிசியை சேர்க்கவும். அடுப்பை சிம்மில் வைத்து இடையிடையே கிளறி விடவும். அரிசி நன்கு வெந்து பால் பாதியாக குறைந்ததும் சீனியை சேர்த்து  நன்றாக கலக்கி 5 நிமிடங்கள் வரை கொதிக்க விடவும்.
    4. இறுதியில்  நெய், முந்திரிப்பருப்பு, காய்ந்த திராட்சை ஏலக்காய் தூள் சேர்த்து 2 நிமிடம் கொதிக்க விட்டு அடுப்பை அணைக்கவும். சுவையான அரிசி பாயாசம் ரெடி.

    Saturday, December 23, 2017

    பிரட் பஜ்ஜி / Bread Bajji



    தேவையான பொருள்கள் -
    1. பிரட் துண்டுகள் - 4
    2. கடலை மாவு - 1/2 கப் 
    3. அரிசி மாவு - 1/4 கப் 
    4. மிளகாய் தூள் - 1 மேஜைக்கரண்டி 
    5. சோடா உப்பு - 1/4 தேக்கரண்டி 
    6. பெருங்காயத்தூள் - 1/2 தேக்கரண்டி 
    7. உப்பு - தேவையான அளவு 
    8. எண்ணெய் - தேவையான அளவு
    செய்முறை -

    1. பிரட் துண்டுகளின் ஓரங்களை வெட்டி விட்டு முக்கோண  வடிவத்தில் வெட்டி கொள்ளவும்.
    2. ஒரு வாயகன்ற பாத்திரத்தில் கடலை மாவு, அரிசி மாவு, சோடா உப்பு, மிளகாய் தூள், பெருங்காயத்தூள்,  உப்பு போட்டு நன்றாக கலந்து அதனுடன் தேவையான அளவு தண்ணீர் ஊற்றி பஜ்ஜி மாவு பதத்திற்கு கரைத்துக்கொள்ளவும்.
    3. அடுப்பில் கடாயை வைத்து எண்ணெய் ஊற்றி சூடானதும் அடுப்பை மிதமான சூட்டில் வைத்து பிரட் துண்டுகளை கரைத்து வைத்திருக்கும் மாவில் முக்கி எடுத்து கடாய் கொள்ளும் அளவுக்கு போடவும். 
    4. ஒரு புறம் வெந்ததும் மறுபுறம் திருப்பி போடவும். இருபுறமும் வெந்ததும் எடுத்து விடவும். மீதமுள்ள எல்லா பிரட் துண்டுகளையும் இதே முறையில் போட்டு எடுக்கவும். சுவையான பிரட் பஜ்ஜி ரெடி. காபி, டீயுடன் பரிமாறவும்.

    Wednesday, December 13, 2017

    சீவல் / Seeval



    தேவையான பொருள்கள் -
    1. இட்லி அரிசி  - 1 கப் 
    2. கடலை மாவு - 1 /2 கப் 
    3. மிளகாய் வத்தல் - 5
    4. வெண்ணெய் - 2 மேஜைக்கரண்டி 
    5. காயத் தூள் - சிறிது 
    6. உப்பு - தேவையான அளவு 
    7. சுடுவதற்கு எண்ணெய் - தேவையான அளவு
    செய்முறை -
    1. இட்லி அரிசியை 4 மணி நேரம் ஊற வைத்து அதோடு மிளகாய் வத்தல், உப்பு சேர்த்து கிரைண்டரில் அரைத்துக்கொள்ளவும். அரைத்த மாவில் கடலை மாவு, வெண்ணெய், காயத் தூள் சேர்த்து நன்றாக பிசைந்து கொள்ளவும்.
    2. ஒரு கடாயில் எண்ணெய் ஊற்றி சூடானதும் அடுப்பை மிதமான சூட்டில் வைத்து முறுக்கு குழலில்  சீவல் அச்சை போட்டு பிசைந்த மாவை குழாய் கொள்ளும் அளவுக்கு நிரப்பி வட்டமாக பிழிந்து விடவும்.
    3. ஒரு புறம் வெந்ததும் மறு புறம் திருப்பி விடவும். இரு புறமும் வெந்ததும் எடுத்து ஒரு டிஸ்யு பேப்பரில் வைக்கவும்.
    4. எண்ணெய் உறிஞ்சியவுடன்  ஒரு காற்றுப் புகாத டப்பாவில் போட்டு வைக்கவும். டீயுடன் சாப்பிட நன்றாக இருக்கும்.

    Wednesday, December 6, 2017

    நிலக்கடலை உருண்டை / Peanut Balls


    சிறியவர்கள் முதல் பெரியவர்கள் வரை விரும்பி சாப்பிடும் நிலக்கடலை உருண்டை எப்படி செய்வதென்று பார்ப்போம் !

    தேவையான பொருள்கள் -
    1. வறுத்து தோலுரித்த நிலக்கடலை - 1 கப் 
    2. பொடித்த அச்சுவெல்லம் - 1 கப் 
    3. ஏலக்காய் தூள் - 1/4 தேக்கரண்டி 
    செய்முறை - 
    1. அடுப்பில் ஒரு வாயகன்ற பாத்திரத்தில் அச்சுவெல்லத்தோடு ஏலக்காய் தூளும்,  1/4 கப் தண்ணீரும் சேர்த்து  கொதிக்க விடவும். வெல்லம் கரைந்ததும் வடிகட்டி மீண்டும் அடுப்பில் வைத்து உருட்டு பதம் வரும் வரை பாகு காய்ச்சவும்.
    2. காய்ச்சிய பாகு சூடாக இருக்கும் போதே நிலக்கடலையில் மேல் ஊற்றி ஒரு கரண்டி கொண்டு நன்றாக கலக்கி சிறிது நேரம் ஆற விடவும்.
    3. ஆறிய பிறகு தண்ணீரில் கையை நனைத்து கொண்டு உருண்டை பிடிக்கவும். ஒவ்வொரு உருண்டைக்கும் தண்ணீரில் நனைத்து உருண்டைகள் பிடிக்கவும். ஒரு கப் நிலக்கடலைக்கு 10 உருண்டைகள் வரை வரும்.

    Friday, December 1, 2017

    பூண்டு சட்னி / Garlic Chutney



    பரிமாறும் அளவு - 2 நபருக்கு

    தேவையான பொருள்கள் -
    1. தோலுரித்த பூண்டு பற்கள்  - 1/2 கப் 
    2. நறுக்கிய தக்காளி - 1
    3. மிளகாய் வத்தல் - 2
    4. உப்பு - தேவையான அளவு 
    தாளிக்க -
    1. நல்லெண்ணெய் - 3 மேஜைக்கரண்டி 
    2. கடுகு - 1 தேக்கரண்டி 
    செய்முறை -
    1. அடுப்பில் கடாயை வைத்து ஒரு மேஜைக்கரண்டி எண்ணெய் ஊற்றி சூடானதும் அடுப்பை சிம்மில் வைத்து மிளகாய் வத்தலை போட்டு லேசாக வறுத்து தனியே வைக்கவும்.
    2. அதே கடாயில் அடுப்பை மிதமான சூட்டில் வைத்து பூண்டு பற்கள், தக்காளி இரண்டையும் தனித்தனியாக  வதக்கி மிளகாய் வத்தலோடு சேர்த்து சிறிது நேரம் ஆறவிடவும்.
    3. நன்கு ஆறிய பிறகு அதனுடன் உப்பு சேர்த்து மிக்சியில் அரைக்கவும். 
    4. அடுப்பில் கடாயை வைத்து மீதமுள்ள இரண்டு மேஜைக்கரண்டி நல்லெண்ணெய் ஊற்றி சூடானதும் கடுகு போடவும்.
    5.  கடுகு வெடித்ததும் எடுத்து சட்னியில் ஊற்றி நன்றாக கலக்கி விடவும். சுவையான பூண்டு சட்னி ரெடி. இட்லி, தோசையுடன் சேர்த்து சாப்பிட நன்றாக இருக்கும்.

    Wednesday, November 29, 2017

    கேப்பை தோசை / கேழ்வரகு தோசை / Keppai Thosai / Kezhvaraku Dosai



    பரிமாறும் அளவு - 2 நபருக்கு

    தேவையான பொருள்கள் -
    1. கேப்பை - 3/4 கப்
    2. இட்லி அரிசி - 1/4 கப்
    3. உளுந்து - 1/4 கப்
    4. உப்பு - தேவையான அளவு
    செய்முறை -
    1. கேப்பை , இட்லி  அரிசி ,  உளுந்து எல்லாவற்றையும் ஒன்றாக சேர்த்து நன்றாக கழுவி தேவையான அளவு தண்ணீர் ஊற்றி 4 மணி நேரம் ஊறவைக்கவும்.
    2. ஊறிய பிறகு அதோடு உப்பு சேர்த்து கிரைண்டரில் அரைத்து 5 மணி நேரம் புளிக்க வைக்கவும். மாவு இதே போல் பொங்கி இருக்கும்.
    3. அடுப்பில் தோசைக்கல்லை வைத்து சூடானதும் ஒரு குழிக்கரண்டி மாவு எடுத்து ஊற்றி விரித்து விடவும். வெந்ததும் திருப்பி போடவும். இரு புறமும் வெந்ததும் எடுத்து பரிமாறவும். சுவையான கேப்பை தோசை ரெடி.
    4. கேப்பை தோசைக்கு காரச்சட்னி நன்றாக இருக்கும்.
    Related Posts Plugin for WordPress, Blogger...